1Pe 3 | BOJ | STEP | Dego kere niŋgi uŋgasari niŋgi dego nuŋgo tamo naŋgo sorgomq di soqniye. Ariya niŋgi qudei nuŋgo tamo naŋgi Qotei aqa anjam dauryosaiabqa di uŋgum niŋgi anjam bei minjraib. Niŋgi naŋgo ŋamgalaq di kumbra bole bole yibqa naŋgi unsibqa dena naŋgi are bulyqab.

1 Peter 3

Uŋgasari niŋgi nuŋgo tamo naŋgo sorgomq di soqniye. Tamo niŋgi na nuŋgo uŋgasari naŋgi kumbra bole bole enjroqniye

1 Dego kere niŋgi uŋgasari niŋgi dego nuŋgo tamo naŋgo sorgomq di soqniye. Ariya niŋgi qudei nuŋgo tamo naŋgi Qotei aqa anjam dauryosaiabqa di uŋgum niŋgi anjam bei minjraib. Niŋgi naŋgo ŋamgalaq di kumbra bole bole yibqa naŋgi unsibqa dena naŋgi are bulyqab. 2 Di kiyaqa? Niŋgi kumbra tiŋtiŋ na walwelosib naŋgo sorgomq di geregere soqnib naŋgi di unsib marqab, niŋgi uŋgasari bole. 3 Niŋgi nuŋgo jejamu walatqa are prugŋgoqnaiq. Niŋgi nuŋgo gate praŋyoqnsib wala bole gateq di jugoqnaib. Osib kolilei na nuŋgo jejamu walatoqnaib. Gara bole wala ti dego jugoqnaib. Iŋgi iŋgi di laŋa jejamu qa wala. 4 Deqa niŋgi nuŋgo are miligi walatqa are qaloqniye. Are miligi aqa wala agiende. Niŋgi are bole na sosibqa tamo uŋgasari kalil naŋgi lawo na gereinjroqniye. Are miligi aqa wala di Qotei aqa ŋamgalaq di tulaŋ boledamu. Wala di ugeqa keresai. 5 Agi Qotei aqa uŋgasari nami soqneb qaji naŋgi naŋgo are miligi degsib walatoqneb. Osib naŋgo segi jejamu Qotei yekritosib a qa tariŋoqneb. Osib naŋgo tamo naŋgo sorgomq di soqneb. 6 Niŋgi Sara uniye. A na aqa tamo Abraham aqa anjam dauryoqnsiqa minjoqnej, “Ni ijo tamo koba.” Deqa uŋgasari, niŋgi Sara aqa kumbra di dauryosib kumbra bole yoqniye. Niŋgi ulaaib. Niŋgi kumbra bole yoqnqab di niŋgi Sara aqa aŋgro tiŋtiŋ sqab.

7 O tamo, niŋgi areqalo bole dauryosib nuŋgo uŋgasari naŋgi ti geregere soqniye. Nuŋgo uŋgasari naŋgi tamo sai. Naŋgi uŋa. Naŋgo jejamu siŋgila sai. Deqa niŋgi lawo na naŋgi kumbra bole bole enjroqniye. Uŋgasari naŋgi dego ŋambile gaigai sqab. Niŋgi degsib qalieosib deqa nuŋgo uŋgasari naŋgi gereinjroqniye. Niŋgi kumbra degyqab di iŋgi bei na nuŋgo pail getentqa keresai. Qotei a nuŋgo pail quoqnqas.

Niŋgi gaigai kumbra bole bole tamo uŋgasari kalil naŋgi enjroqniye

8 Ariya e na ijo anjam endi kobotqa osiy niŋgi endegsi merŋgwai. Niŋgi kalil koba na geregere are qujaitosib soqniye. Sosibqa tamo kalil naŋgi qa duloqnsib Qotei aqa tamo uŋgasari naŋgi dego qalaqalainjroqnsib naŋgi qa are boleiŋgoqneme. Osib nuŋgo segi ñam aguq atoqniye. 9 Ariya tamo qudei naŋgi na niŋgi kumbra uge eŋgibqa niŋgi na kamba naŋgi kumbra uge enjraib. Naŋgi na niŋgi misiliŋgoqnsib anjam uge merŋgibqa niŋgi na kamba anjam uge minjraib. Niŋgi kamba naŋgi qa oqnsib Qotei pailyoqniye. Qotei a niŋgi kumbra degyqa osiqa niŋgi metŋgej. Deqa niŋgi kumbra bole degyibqa Qotei a na kamba niŋgi kumbra bole eŋgoqnqas.

10 Agi Qotei aqa anjam bei nami endegsib neŋgreŋyeb unu,

“Tamo bei a mandamq endia so bole sqa marsimqa a anjam uge bei maroqnaiq.
A gisaŋ anjam dego maroqnaiq.
11 A kumbra uge kalil torei qoreiyosim kumbra bole segi yoqneme.
Osim tamo uŋgasari kalil naŋgi koba na are qujaitosib kumbra bole yoqnqajqa siŋgilaoqneme.
12 Di kiyaqa? Tamo uŋgasari kumbra tiŋtiŋ yeqnub qaji naŋgi Tamo Koba Qotei na geregere taqatnjrejunu.
Osiqa naŋgo pail dego quetnjreqnu.
Ariya tamo uŋgasari kumbra uge uge yeqnub qaji naŋgi Tamo Koba Qotei na olo qoreinjreqnu.”

Iga kumbra bole bole yoqnimqa jeu tamo naŋgi na iga jaqatiŋ egoqnqab

13 O was qu, niŋgi kumbra bole bole yqajqa siŋgilaoqnqab di tamo yai na niŋgi olo ugeugeiŋgwas? 14 Bole, niŋgi kumbra tiŋtiŋ yibqa tamo qudei naŋgi na nuŋgo kumbra di unsib deqa jaqatiŋ eŋgwab di uŋgum. Niŋgi deqa areboleboleiŋgem. Naŋgi na niŋgi naŋgi ulainjrqajqa anjam bei merŋgibqa niŋgi naŋgi qa ulaaib. Osib are gulubeiŋgaiq. 15 Niŋgi nuŋgo are miligiq di Kristus atsib sosibqa a segi qujai nuŋgo Tamo Koba degsib are qaloqniye. Yimqa tamo qudei naŋgi nuŋgo kumbra di unsib endegsib nenemŋgoqnqab, “Niŋgi iŋgi bole kie qa tariŋoqnsib deqa niŋgi tulaŋ areboleboleiŋgeqnu?” Degsib nenemŋgoqnibqa niŋgi na kamba olo naŋgi anjam minjrqajqa gam gereiysib soqniye. O was qu, niŋgi bati gaigai degyoqniye. 16 Ariya niŋgi anjam siŋgila na minjraib. Niŋgi lawo kumbra na ti kumbra bole na ti naŋgi anjam minjroqniye. Osib niŋgi gaigai Qotei aqa ŋamgalaq di une saiqoji soqniye. Bole, niŋgi Kristus dauryoqnib jeu tamo naŋgi nuŋgo kumbra bole di unsib deqa niŋgi anjam uge merŋgoqnsib misiliŋgoqnqab. Ariya bunuqna naŋgi naŋgo anjam deqa olo jemainjrqas. 17 Iga kumbra bole bole yoqnimqa Qotei na marim jeu tamo naŋgi na iga jaqatiŋ egoqnqab di kere. Ariya iga kumbra uge uge yoqnimqa tamo qudei naŋgi deqa jaqatiŋ egoqnqab di uge. Iga degyqasai.

Kristus a moisiq olo subq na tigelej. A na iga oqajqa deqa

18 Niŋgi Kristus qa are qaloqniye. Kristus a tamo tiŋtiŋo. Ariya a na tamo uŋgasari uge uge naŋgo sawa osiq naŋgo une qa osiq moiej. A na niŋgi joqsim Qotei aqaq oqwajqa deqa osiq niŋgi qa moiej. A bati qujai qa moiej deqa a olo moiqa keresai. A tamo bulyosiqa mandamq endi soqnej. Sonaqa jeu tamo naŋgi na a qalnab moiej. Ariya a olo subq na tigelosiqa a mondor ti soqnej. 19 A mondor ti sosiqa a moio sawaq aisiq tamo nami moreŋeb qaji naŋgo mondor Qotei aqa anjam palontosiq minjroqnej. 20 Noa aqa bati qa tamo naŋgi di Qotei aqa anjam gotraŋyoqneb. Bati deqa kumbra uge tulaŋ kobaej. Ariya Qotei a tamo naŋgo kumbra uge deqa naŋgi urur kambatnjrosaioqnej. A tariŋosiq sokobaiyonaqa Noa a qobuŋ kobaquja gereiyej. Gereiysiq koboonaqa tamo uŋgasari 8-pela segi qobuŋ gogetosib sonabqa awa koba bosiqa ya tulaŋ koba dej. Ariya tamo uŋgasari 8-pela naŋgi di Qotei na eleŋej deqa naŋgi bole soqneb. 21 Dego kere niŋgi ya na yanso eb deqa Qotei a niŋgi dego eleŋej. A ya dena nuŋgo jejamu qaji jiga di yansetŋgosai. Niŋgi yanso eb bati deqa niŋgi Qotei pailyonab a na nuŋgo are miligi qaji jiga yansetŋgej. Qotei na Yesus Kristus olo subq na tigeltej gam dena a na niŋgi eleŋej. 22 Onaqa Kristus a laŋ qureq oqej deqa bini a Qotei aqa baŋ woq di awejunu. Deqa laŋ aŋgro naŋgi ti laŋ qaji mondor kokba ti laŋ qaji siŋgila ti kalil naŋgi Kristus aqa sorgomq di unub.